Latärnen Apéro Fasnacht 2023

26. Februar 2023

E huffe isch anderscht worde syt dr letzschde richtige Fasnacht im 2019. Doorum goht d Aareed e bits länger wie suscht.

Liebi Fasnächtler*Innen
Liebi Vorträäbler_innen
Liebi Gönner_innen
Liebi Passivi – wyblich / männlich
Liebs Aäs und ihms
Oder ganz eifach Liebi alli

Härzligg Willkomme do bim Fasnachtsapéro 2023. Jä s isch alles nümm wiie friener, sogar unser scheens Baseldytsch wird beschnitte. Ich ha friener nie öbbis negativs dänggt, wenn mi dr Babbe am Sunndig zur Beggerei Schällmaa gschiggt het, zum e Punschkugele, e Mohrekopf und e Maitlibai z hoole. Hüt ischs Maitlibai e Glüggsbringer, dr Mohrekopf ein Schaumkuss und d Punschkugele gits bald niene mee.

Jo die Linke schryybe uns normal Bürger bald alles vor, was me wie no dörf saage. Nur sälber sich an d Vorschrifte halte, das kenne si nit. Grad letschdi isch mir fascht e Stügg z Vieri im Hals stegge blyybe, wo mi Dochter yiglaae hett und sait so näbebi – Babbi schmeggt dir dr Russezopf..? do han ich grad 2 moll miesse Schlugge und ha für mi dänggt, …ah, das darf i no saage.

Jä guet, kömme mir zur Fasnacht zrugg. Wen ich mir so überleege due, so hätte mir aigentligg s Goschdym vo de letschte 2 Joor könne bhalte , den dä Ängländer wär immer no top aktuell. Au wenn dr Andrew d Hose het widder doobe, mag en d Mamme Elisabeth trotzdäm nümm loobe. Und au vo dr kurz zytigge Premierminischdere het sich d Elisabeth schnäll wider miese Verabschiede, das isch arg, drum hett si dänggt ich nimm dr Huet und stygg in Sarg. Also ihr seehnd dr Ängländer wär immer no aktuell, aifach mit emene Truurfloor.

Doch unser neu Sujet isch viel intellegdueller und au botanischer.
Kurz erklärt:
Dr Yggdrasil (Dr Wältebaum) oder Wältesche
** Uss dr Nordische Mythologie : Drei wohlbeleibdi Nornen (Dame) begiesse d Wurzle vom Baum mit Wasser ussem Urbrunne. Oobe uffem Baum sitzt e namelose Schugger (äxgiisi) Adler und am Stamm entlang lauft das Eichhörnli Ratatösker. Är isch dr Wältebaum will är im Zentrum vo dr Wält stoot und alli Wälte mit enand verbindet. Als Wältachse verbindet är die drei Ebene Himmel, Mittelwält und Unterwält **

Me het mir nit überlifferet, ob unseri Goschdym Kommision die Idee zum Sujet binnere Joga und Esoterikstund ussgarbeitet het. Aber dr Ghaimdienscht vo de Schnygge behauptet me haig si alli immene Zimmer beobachtet, wie si mit eme Raucherstääbli in dr Fuudifalde dr Sunnegruess gmacht haige und do dr bi die Sujet Idee gschaffe haig.

So, mi Dozänte Vortrag isch vrbi und hoff ihr alli sind mit Freud und Liideschaft an dr Fasnacht drbi !!

So, jetzt halti, …saag Tschau zämmä
Eure Schwaldi