Guggemuusig Krach-Schnygge 1964

Besammlig isch am halb 10ni bim Restaurant Bundesbahn gsi, grad hinter em Bahnhof SBB. Bi Gipfeli und Kaffi hän mr uns scho s erschtmol gsterggt für dr langi Bummelsunntig. Gege die elfi sin mer in Richtig Brauerei «Unser Bier» los gloffe. Dr Herr Istvan Akos und s gsamte Team het uns härzlig wilkomme gheisse und mer hän schon emol s erscht Bier und e Bretzel beko. Gruppewiis het denn jede vo uns e kliine Iblick beko in d Frimegschicht, s Bierbraue und dr gsamti Prozäss wo das umfasst. Um einigi Anekdoote richer rund ums Bierbraue, sin mer denn zrugg ins Restaurant Bundesbahn wo bereits e feins Zmittag uf uns gwartet het. Bi däm usgiibige Stopp hets au no glängt  mit e paar Passivmitglieder ins Gspröch z ko, bevor mer denn mit em 10ner Tram in Richtig Innestadt gfahre sin. Dört isch eine zu uns gstosse wo sit längerem in de Ferie gsi isch und uns aber am Sunntig beehrt het – unsere Vize-Presidänt dr Peter.
Mit ihm im Schlepptau hän mer, wie an dr Fasnacht, so au am Bummel bim Stapfelberg e Ständeli für unseri treue Begleiter zum Beschte gä. Grad im Aschluss hän mer e Pause iglegt und au ebits de andere Gugge und Clique glauscht.
Witer sin mer denn immer em Major noche durch d Innestadt. Dr Kohlebärg uffe und dur d Gässli bis mer bim Rümelinsblatz schliesslich wieder use ko sin. Bim L’Unique hän mer denn als gschlosseni Gsellschaft e paar feini Nachos uftischt beko.
Im Aschluss hän mer witherhin unseri Rundene im Grossbasel dreit bis mer denn gege die 8ti in d Freie Stross iboge sin. Zwüsche vyylne fotografierende und filmende Zueschauer hän mer uns dr Wäg Richtig Märtblatz bahnt. Dört isch denn dr letschti Halt gsi bevor mer uns zum Marc und sim Restaurant Hahn ufgmacht hän. Dört ako isch den Bummel au leider scho wieder verbi gsi und es het dr letschti Appezäller uf d Fasnacht 2018 gä.

E kleine bildliche Idruck bekunnsch in unserem Fotialbum.

Suche