Guggemuusig Krach-Schnygge 1964

Am Mittwuch sin mer wieder bi dr Wettstaibrugg als farbig gekleideti Chinese igstande. Vo dört het unseri Route übere Wettsteiplatz, durchs Klingeli bis zum Seibi gfiehrt. Bi dr Drayschibe hen mer unseri Fründe «Die Antygge» troffe und hän bimene kleine Apéro e langjährigi Fründschaft pflägt. Verbi am Comitée bim Steineberg, uffe zum Kunschtmuseum und bis zum Wettstaiplatz zrugg sin mer denn witer. Dört hän mer uns leider vo unsere gliebte Latärne miesse trenne, will sich eine vo de Reife während em Cortège leider e Platte igfange het. Nachere kurze Verschnufspause bim Consum sin mer denn schliesslich im Restaurant Saffre zum Znacht ikehrt und hän e feins Znacht dörfe gniesse.

Aschliessend sin mer an d Schiffländi und Stäge durab uf d MS Christoph Merian e Ständeli go spiele. Mit e paar Blötterli-Märsch und Stückli hän mer uns den via Freie Stross und Münsterberg zu unserne Fründe de Primidoofe Waggis ufgmacht um au vor ihrem Käller no Ein z spiele. Derno hän mers uns nit lo nä au mit ihne no e kleine Apéro znä bevor mer im änge Gässli wieder igstande und zur Pfalz marschiert sin. Unsere Major het in sinere Asproch d Fasnacht nomol Revue passiere lo und mer hän uns mit emne Stückli nomol ganz härzlich bim Vortrab bedankt. Ohni sie hätte mer dr Wäg die drey Dääg nit so eifach gfunde. Es isch denn scho fascht Zwei gsi und mer sin nomol mit vollem Isatz durchs Gross- und Glaibasel gloffe und hän e letschts mol ganz viel Fasnacht ufgsooge. Am viertel vor vieri denne, hän mer vor em Hahn zum letschte Stückli agsetzt. Mer häns nomol gnosse und derno sin die scheenschte drey Dääg scho wieder verbi gsi.

Suche