Guggemuusig Krach-Schnygge 1964

Es het wieder bimmelet und glöcklet im Hahn und denn het me gwüsst, d Schnygge sin im Huus. Mit unserem Käsperli-Goschtüüm sin mer gege die 4ri igstande und in Richtig Klingetal marschiert. Im Höfli vo dr Rhypolizei hän mer e glains Platzkonzärt gä. Inere schöne Asproch vo unserem Major hän mer in däm Höfli em Hedi gedänggt wo uns joorelang vor em Stärnemarsch bi sich zur Stubbete iglade het. Truurigerwiis isch s Hedi in im letschte Joor vo uns gange. D Errinnerig an si wird in de Köpf vo de Schnygge witerläbe.

 Dangge viel mol für alles Hedi!

Bim aschliessende Apéro hän mer uns gstärkt und d Furzhaspelwaggis sin zu uns gstosse. An ihrem «arbetsfreie Zyschtig» sin si vo dört a mit unserem Vortraab vorusgloffe. Aber no witeri Gescht händ sich in überraschendem Tenue zu uns gsellt. E Mitgllid und Fründe vo de Schnygge, alli verkleidet als T-Rex, hän uns überfalle und allne e Schmunzle ins Gsicht gsetzt. Nachdem mer somit komplett gsi sin, hän mer uns in dere vergrösserete Formation in Richtig Mässeplatz ufmgacht. Grad hinter de Schränzgritte als Nummer 3 sin mer in d Clarastross iboge und hän dä langi Fuessmarsch uf uns gno. Au das isch, wie jedes Joor, e Highlight gsi wenn me zwüsche de Menschemasse durchs Gross- & Glaibasel wanderet.

Das Joor hän mer e witers Privileg dörfe gniesse und zwar sin mir als Gaschtgugge uf dr IG-Bühni ufem Seibi ufträte. E Erfahrig wo ebefalls allne grossi Freud bereitet het.  Grad derno hän mer denn bi dr Schlüsselzunft nomol schnäll e Päusli iglegt bevor mer am 10ni denn als Schlussbouquet uf d Märtplatz-Bühni erschiene sin. Natürlich hän mer au dört nomol alles gä. Uneri goldige Bändeli sin bim letschte Stück in Zueschauer gfloge und mit däm hän mer uns den au verabschiedet. Nach dr Bühni sin mer bis zum Latini, wo mer bimene Blatzkonzärt nomol für Stimmig gsorgt hän. Zur Geischterstund hän mer in dr Schlüsselzunft e kleine Imbiss zu uns gno. Vo dört us sin mer unserne grosse Nase und em Major spielend durch die beide Basel nochegloffe. Das bis in de friehe Morgestunde au dr Guggezyschtig verbi gsi isch.

Bilder dän mer in unserem Fotialbum.

Suche