Guggemuusig Krach-Schnygge 1964

Wenns wieder nach Mimössli schmeckt und die erschte Zoggeli dusse ghörsch, denn weisch es isch wieder Fasnacht. Wie all Joor het unseri Fasnacht mit em Fotoshooting uf dr Claramatte agfange. Mer sin sin alli suuber useputzt gsi und hän brav durch unseri Larve in d Kamera glächlet. Eine sogar no bitseli me als alli andere nämlich s Geburtsdaagskind vo däm Daag – unsere Schlagzyyger dr Martin. Nach emene Umtrunk und paar blöde Sprüch zu sine Ungunschte, sin mer denn bi dr Clarastross igstande und dr Cortège 2018 het agfange. Uf unserer Route übere Mässeplatz, d Wettsteibrugg  bis zum Seibi und schliesslich zum Märtblatz hän mer e paar Witzli und Bier ustuscht. Eifach e guedi Zyt gha.  Znacht hän mer denn im Restaurant „zum Lamm“ zu uns gno, wo mer uns alli hän dörfe über e feins Kalbs-Piccata mit Spaghetti freue.

Gstärkt sin mer denn überi die mittleri Brugg zum Hotel „Drey Waggis“. Dört hän mer den Eine usegloh, ganz zum vergniege vom awäsende Publikum. Grad im Aschluss hän mer uns ufe Wäg gmacht zum Stapfelberg, wo mer zumene Blatzkonzärt mit de Sonate-Schlyyfer verabredet gsi sin. Abwächselnd hän mer e paar Stückli zum Beschte gä und alli händ dr Plausch gha. Im Aschluss hän mer bim Consum no e letschte Boxestopp iglegt. Gege die Zwei, het denn vor em Restaurant Hahn, dr Fasnachtsmäntig für uns si Änd gfunde.

Impressione vom Meentig findsch in unserem Fotialbum.

Suche